"Куйуур олоҥхото-2019" ыччат фестивалын түмүктэрэ

Кулун тутар 22-23 күннэригэр Нам улууһун Хатырык нэһилиэгэр «Ыччат Олоҥхоһут» Республикатааҕы общественнай түмсүү сыл ахсын ыытар сүрүн тэрээһинин – «Куйуур Олоҥхото-2019» олоҥхону толорор ыччаттар республикатааҕы күөн-күрэстэрин Нам улууһун чулуу олоҥхоһута Василий Николаевич Попов – Бочоох төрөөбүтэ 110 сылын көрсө тэрийэн ыытта.

Бастакы күн, кулун тутар 22 күнүгэр М.К. Аммосов аатынан судаарыстыбаннас түмэлигэр экскурсия, тэрээһин үөрүүлээх арыллыыта, бөлөҕүнэн уонна биирдиилээн толорууну истии түүн үөһүгэр дылы буолла. Итини тэҥэ, «Ыччат Олоҥхоһут» общественнэй түмсүү салайааччыта Юрий Борисов хоноһолоон түспүт ыалыгар Алексей Михайлович Пинигин дьиэ кэргэнигэр уонна чугастааҕы ыалыгар анаан «Ыалга олоҥхолооһун» диэн туспа истии тэрийбитэ.

Тэрээһин иккис күнүгэр, кулун тутар 23 күнүгэр салгыы олоҥхону истии сарсыарда эрдэттэн саҕаланна, онтон олоҥхолоон бүппүт оҕолор бука бары куйуурдааһын сиэрин-туомун эбэҕэ киирэн көрдүлэр. Ити кэннэ, олохтоох туристическай комплекска сылдьан ыраас салгынынан тыынан, күлэн-оонньоон ыллылар. Эбиэттэригэр собо миинэ истилэр, көмүс хатырыктааҕы сиэтилэр.

Быйылгы, бэһис төгүлүн ыытыллар «Куйуур Олоҥхото-2019» тэрээһиҥҥэ хаһааҥҥытааҕар да элбэх, уопсайа 46 ыччаткыттыыны ылла. Ол иһигэр 4 бөлөҕүнэн толоруу уонна 21 биирдиилээн, олоҕурбут ньыманан толоруу баара бэлиэтэннэ. Ыччаттар АГИКИттан, Культура коллеһыттан, Мэҥэ-Хаҥаластан, Нам улууһун нэһилиэктэриттэн кэлэн кытыннылар.

Күөн күрэс Дьүүллүүр сүбэтигэр М.К. Аммосов аатынан ХИФУ профессора Г.С. Попова – Санаайа, Республикатааҕы «Олоҥхо Киинин» сүрүннүүр үлэһитэ У.М. Флегонтова, Нам улууһун Култуураҕа уонна духуобунай сайдыыга управлениятын специалиһа М.А. Платонова үлэлээтилэр.

Бырайыак ааптара, Дьүүллүүр сүбэ Председателя Г.С. Попова – Санаайа бэлиэтииринэн, ыччаттар лаппа тупсубуттар, ырыалара-тойуктара сайдыбыт, тыыннара уһаабыт. Тыҥааһыннаах күрэх түмүгэр, дьүүллүүр сүбэ бу курдук кыайыылаахтары быһаарда:

Олоҕурбут ньыманан толорууга:

«Добун Аат» (Гран-При) – Никифоров Виталий Витальевич, Мэҥэ-Хаҥалас, I Тыыллыма нэһилиэгин Култуура киинин дириэктэрэ. А.И. Попов-Муотаан "Бэриэт Бэргэн" олоҥхотун 40 мүн. толордо, 120 баал.

I истиэпэннээх Диплом – Аммосова Марфа Федотовна, АГИКИ 2-с кууруһун устудьуона. Н.И. Степанов-Ноорой "Күн Эрили" олоҥхотун 40 мүн. толордо, 119 баал.

II истиэпэннээх Диплом – Нюргусова Яна Петровна, культуролог идэлээх, Дьокуускай к. П.Игнатьев "Кулан Кыыртай"  олоҥхотун 45 мүн. толордо, 117 баал.

III истиэпэннээх Диплом – Степанова Анисия Николаевна, Мэҥэ-Хаҥалас Алын Бэстээх Олоҥхо Дьиэтин фольклорга исписэлииһэ. Н.И. Степанов-Ноорой "Күн Эрили" олоҥхотун 29 мүн. толордо, 116 баал.

Анал ааттар:

1. Сэһэн сүнньүн тутар олоҥхоһут – Филиппов Петр Николаевич, ДьКИК устудьуона. Г. Слободчиков-Тэлээркэ "Дьулуруйар Ньуогун Боотур" олоҥхотун 47 мүн. толордо, 112 баал.

2. Тэтими тутар олоҥхоһут – Поскачина Алина Альбертовна, ДьКИК устудьуона. С.И. Иванов-Чочу Сэмэнэ "Киис Бэргэн" олоҥхотун 42 мүн. толордо, 115 баал.

3. Кылыһах ырыалаах, дорҕоон тойуктаах олоҥхоһут – Винокурова Марианна Николаевна, Нам улууһун култуураҕа исписэлииһэ. П.Ядрихинскай-Бэдьээлэ "Дьырыбына Дьырылыатта Кыыс Бухатыыр" олоҥхотун 24 мүн. толордо, 115 баал.

4. Хомоҕой тыллаах олоҥхоһут – Барамыгин Владислав Игнатьевич, ДьКИК устудьуона. В.О. Каратаев "Модун Эр Соҕотох" олоҥхотун 14 мүн. толордо, 108 баал.

5. Удьуор утумун тутар олоҥхоһут – Обутова Даина Константиновна, Нам улууһун Хатырык нэһилиэгин Оҕо музыкальнай оскуолатын фольклорга уһуйааччыта. Д.М. Слепцов-Дайыыла "Көтөр Мүлгүн" олоҥхотун 50 мүн. толордо, 112 баал.

6. Түөлбэ олоҥхоһут – Иванов Станислав Александрович, Мэҥэ-Хаҥалас Култуураҕа управлениетын исписэлииһэ. Н.А. Абрамов-Кынат "Ньургун Бөҕө" олоҥхотун 17 мүн. толордо, 113 баал.

7. Кэскиллээх олоҥхоһут – Слепцова Екатерина Гаврильевна, АГИКИ 1-кы кууруһун устудьуона. Эбээннии нимканы 9 мүн. толордо, 108 баал.

8. Түһүлгэлээх олоҥхоһут (истээччи биһирэбилэ) – Фомина Изабелла Валерьевна, АГИКИ устудьуона. Д.А. Томская-Чайка "Үчүгэй Үөдүгүйээн, Куһаҕан Холдьугур" олоҥхотун 16 мүн. толордо, 107 баал.

Куолаан толорууга:

I истиэпэннээх Диплом – "Манчаары ыччаттара" бөлөх, Мэҥэ-Хаҥалас улууһа. Иванов С.А. "Хатан Боотур" олонхото, этээччи ааптар Иванов С.А., 3 ырыаһыт уолан эр. 45 мүн., 113 баал.

II истиэпэннээх Диплом – "Долун" бөлөх, АГИКИ устудьуоннара. Дьааҥылыы олоҥхолооһун. Д.А. Томская-Чайка "Үчүгэй Үөдүгүйээн, Куһаҕан Холдьугур" олоҥхотун этээччи Фомина И.В., 2 уолан эрэ, 2 кыыс куо ырыаһыттар. 26 мүн., 113 баал.

III истиэпэннээх Диплом – "Долун" бөлөх, АГИКИ устудьуоннара. Н.М. Тарасов "Ала Туйгун" олоҥхотун этээччи Ефремова Айыына Аркадьевна, 1 уолан эр, 7 кыыс куо ырыаһыттар. 36 мүн., 108 баал.

Кыайыылаахтар тустаах бириистэринэн, анал дипломнарынан наҕараадаланнылар. Итини тэҥэ,  «Ыччат Олоҥхоһут» Республикатааҕы общественнай түмсүүгэ 18 ыччат саҥа чилиэнинэн киирдэ. Онон, билиҥҥи туругунан, түмсүү уопсайа 102 чилиэннэннэ.

Түмүктээн эттэххэ, бука бары интэриэстээх дьон, тустаах тэрилтэлэр «Ыччат Олоҥхоһут» түмсүү тула сомоҕолоһон, Василий Николаевич Попов – Бочоох төрөөбүтэ 110 сылын көрсө ыытыллыбыт «Куйуур Олоҥхото-2019» тэрээһин үрдүк таһымнаахтык ааста.